Keiserleg banner for ny skule i 2014

All tvil om at det kjem ein ny vidaregåande skule på Bryne i 2014 skal døyvast. Eit digert banner som proklamerer den nye skulen dekker nå den eine veggen på Jæretek-bygget.

Ein sponsoravtale mellom Jæren Kompetansesenter og Bryne FK har resultert i at det kjende kaizer-biletet av 1.divisjonslaget blir brukt i marknadsføringa av den nye skulen. Biletet blei tatt då Kaizers Orchestra vart Bryne-sponsor før fotballsesongen i år.

– Me skal få den største yrkesfaglige vidaregåande skulen i Rogaland om få år, og det er verd å slå eit skikkeleg slag for, seier dagleg leiar i Jæren Kompetansesenter Leiv Vårdal.

«Keiser, keeper eller kokk? Her kjem Bryne vidaregåande skule i 2014″ er meldinga.

Banneret heng på bygget som etter planen skal vidareførast i den nye skulen, bygget som hovudverneombod ved Time vgs, Ole Todnem, kallar ei rønne og som han og fleire andre har meint bør jamnast med jorda.

Jærtek-bygget, som det heiter ved Time vgs, kom dårleg ut då Asplan Viak sjekka bygga til dei vidaregånde skulane i fylket med tanke på universell utforming for eit års tid sidan.

Prosjektleiinga i fylket har gått langt i å melda at bygget først blir pussa opp etter at den nye skulen står ferdig. Uansett skal kostnadene med å rusta det opp inkluderast i dei 835 millionane nyskulen skal kosta.

Samstundes har nokre av fylkespartia som stemte nei til ny skule i fylkestinget i haust, meldt at dei går til val neste år på å få omgjort vedtaket om å byggja skulen. Dei meiner fylket får alt for mykje gjeld å drassa på med eit slikt prosjekt.

Venstre vil at dei to vidaregåande skulane på Bryne heller skal pussast opp for 180 millionar kroner.

Som ein av dei Time-tilsette mumla då ho kikka opp på banneret: – Sjå her heng det, og så går me og undar om det blir noko av heile skulen.

Men prosjekteringa av den nye skulen fram. Annie Prestegård har fått jobben som koordinator for brukergruppene som skal involverast ved Time vidaregåande skule.

Og nå har altså Bryne FK meldt seg på med keiserleg støtte til nye Bryne vidaragåande, som skal stå ferdig om tre og eit halvt år.